Pesë kineastë nga Kosova i shtohen Akademisë Evropiane të Filmit, Eshref Durmishi: Kemi marrë një hov të mirë

Akademisë Evropiane të Filmit i shtohen edhe pesë kineastë të tjerë nga Kosova, emra premtues dhe që kanë njohur suksese së fundmi.

Regjisorja Antoneta Kastrati me filmin e saj të parë artistik “Zana”, pas premierës në Toronto u propozua për të përfaqësuar Kosovën në Oscar 2020.

Regjisorja Blerta Basholli me filmin “Zgjoi” rrëmbeu tre trofe në Sundance Film Festival.

Norika Sefa u vlerësua me një çmim special në “Rotterdam Film Festival”, ndërsa filmi i regjisores More Raça dha premierën në festivalin e Sarajevës dhe Kajros.

Arritje ka njohur edhe aktori dhe producenti Eshref Durmishi, i cili ishte aktor dhe producent në filmin e parë të Kosovës të nominuar për Oscar. Me këto emra, bëhen 23 anëtarë nga Kosova që janë pjesë e kësaj Akademie.

Ky i fundit u shpreh për Euronews Albania se rrugëtimi në Akademinë Evropiane të Filmit është një lajm i mirë në këto ditë të vështira, për artistët dhe kineastët e Kosovës.

“Para 20 viteve ne ia kemi nisur nga zero, ose ndoshta nga minus, se gjatë luftës ose para luftën ne nuk e kemi zhvilluar ashtu siç kemi dashur. Tani kemi marrë një hov të mirë”, përfundoi ai.