Salianji: Nuk është zbardhur vendimi mbi rekursin tim, zvarritje e qëllimshme

Ervin Salianji, ka ngritur akuza të rënda ndaj Gjykatës së Lartë, duke e akuzuar për zvarritje të qëllimshme të procesit gjyqësor ndaj tij. Në një konferencë për media, Salianji denoncoi faktin se prej më shumë se 100 ditësh nuk është zbardhur ende vendimi për rekursin e paraqitur prej tij, ndonëse afati ligjor për këtë është 60 ditë.

Salianji theksoi se kjo vonesë përbën jo vetëm shkelje të ligjit procedural, por edhe pengon të drejtën e tij për t’iu drejtuar Gjykatës Kushtetuese dhe më pas Gjykatës Evropiane për të Drejtat e Njeriut (GJEDNJ).

“Ka një pengesë me urdhër politik, nuk është bërë zbardhja e rekursit nga Gjykata e Lartë. Është bërë falsifikim i shortit për të përzgjedhur trupën gjyqësore që do të shqyrtonte çështjen time. Pse u largua një trupë e përzgjedhur me short elektronik dhe u zëvendësua me një trupë të emëruar përmes miqësive?”, u shpreh Salianji.

Salianji paralajmëroi se sapo të zbardhet vendimi, do ta çojë çështjen në Gjykatën Kushtetuese dhe më pas në Strasburg, për të kërkuar drejtësi ndërkombëtare.