Zjarr masiv në kodrat e Karinës në Peqin, flakët përfshijnë edhe Sinaballajn

Një zjarr masiv ka përfshirë kodrat e Karinës në Peqin, ndërsa flakët janë përhapur me shpejtësi deri në Sinaballaj, në territorin e Rrogozhinës.

Situata paraqitet kritike, dhe ndërhyrja nga ajri ka nisur me dy helikopterë të shërbimit zjarrfikës dhe ushtrisë.

Sipas raportimeve paraprake, flakët janë favorizuar nga temperaturat e larta dhe era e fortë, duke përfshirë një sipërfaqe të madhe me ullishte dhe kullota.

Deri më tani nuk raportohen persona të lënduar, por dëmet materiale dhe ato mjedisore janë të konsiderueshme.

Forcat zjarrfikëse ndodhen në terren dhe po punojnë në kushte të vështira për të lokalizuar dhe shuar vatrat aktive.

Në ndihmë të tyre janë bashkuar edhe banorët e zonës, të cilët po kontribuojnë vullnetarisht për përballimin e emergjencës.

Autoritetet u bëjnë thirrje qytetarëve për kujdes të shtuar dhe bashkëpunim, ndërsa situata vijon të mbetet kritike dhe nën monitorim të pandërprerë.

LEXONI GJITHASHTU:

• Motorët e ujit përplasen në bregdetin e Golemit, plagoset 31-vjeçari nga Kosova
• “Nuk dua të kthehem më në shtëpi”, Sazani dhe Karaburuni magjepsin turistët e huaj