Tre të arrestuar për dhunën në plazhin e Ksamilit, çfarë thotë policia

Policia e Shtetit ka dalë me një njoftim zyrtar lidhur me sherrin e dhunshëm që ndodhi të shtunën në plazhin e Ksamilit.

Sipas policisë, janë arrestuar tre persona, të cilët akuzohen për dhunë ndaj një 46-vjeçari, ndërsa një 17-vjeçar nga Kamza është proceduar në gjendje të lirë.

Të arrestuarit janë: A. T., 43 vjeç, banues në Berat, S. S., 18 vjeç, banues në Dibër, dhe A. Z., 35 vjeç, banues në Durrës.

“Nga hetimet rezultoi se këta shtetas, në bashkëpunim me njëri-tjetrin, për motive të dobëta, kanë goditur me sende të forta, pranë një plazhi publik në Ksamil, shtetasin A. P., 46 vjeç, banues në Tiranë, duke i shkaktuar dëmtime trupore”, thuhet në njoftimin e policisë.

Po ashtu, sipas policisë, në procedim penal është marrë edhe bashkëshortja e 46-vjeçarit të dëmtuar, pasi ka shkaktuar dëme materiale në “beach bar”-in e njërit prej të arrestuarve.

“Gjithashtu, lidhur me këtë ngjarje, u referuan materialet në Prokurori për veprën penale ‘Shkatërrimi i pronës’ dhe nisi procedimi penal për shtetasen O. P., 40 vjeçe, pasi pas konfliktit kjo shtetase ka dëmtuar ambientin duke shkatërruar pajisje dhe sende të tjera në ‘beach bar’-in e shtetasit të arrestuar A. T.”, thuhet në njoftimin e policisë.

Policia njofton se materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.

Gjithçka e thyer dhe e shkatërruar, pronarët në Ksamil u përplasën për kontrollin e një plazhi

Një konflikt ka ndodhur në një nga plazhet e Ksamilit, ku është raportuar për përplasje fizike mes stafit të një bari dhe pronarit të një hoteli. pic.twitter.com/F4HtvrbPEL

— Euronews Albania (@EuronewsAlbania) July 20, 2025

LEXONI GJITHASHTU:

• VIDEO/ Ksamil, konflikti për hapësirën e plazhit degjeneron në dhunë
• VIDEO/U paraqit si u dhunuar në pamjet në Ksamil, ngjarja rezulton ndryshe