Zefi rrëfen përvojën e vështirë në Itali: Përballje me racizmin që në muajt e parë

Sulmuesi i Kombëtares U-21 të Shqipërisë, Kevin Zefi, ka ndarë së fundmi me median prestigjioze “Irish Independent” një rrëfim personal mbi sfidat që ka përjetuar gjatë qëndrimit në Itali, si pjesë e akademive të klubeve të njohura si Inter dhe më pas Roma.

Futbollisti 19-vjeçar, i cili verën e vitit 2021 u transferua nga Shamrock Rovers në Irlandë drejt Interit U-17, ka folur hapur për përballjen me racizmin, izolimin dhe vështirësitë e adaptimit në një ambient të ri futbollistik dhe kulturor.

“Mbërrita si një djalosh irlandez, gjysmë shqiptar dhe racizmi filloi të ndjehej. Kishte lojtarë kundërshtarë, por edhe shokë skuadre që flisnin pas shpine dhe mendonin se nuk i kuptoja. Ishte shumë e vështirë. Pas katër muajsh doja të largohesha nga Italia”, u shpreh ai.

Zefi tregon se përveç përjetimeve të vështira personale, hasur edhe me një filozofi trajnimi të panjohur për të, që ai e përshkruan si “agresive” dhe “me stil të vjetër”.

“Më vunë të luaja në role të ndryshme. Mënyra e të mësuarit ishte shumë e tepruar për mua. Nuk funksionoi. Kam brenda vetes zjarrin për t’u treguar Interit dhe Romës se kanë gabuar.”

Për sezonin 2024–2025, Zefi është aktualisht një lojtar i lirë, pasi mbylli një vit jo të lehtë te Roma U-21. Interes për të, sipas mediave ndërkombëtare, kanë shfaqur klube nga Belgjika dhe Holanda, ndërsa vetë lojtari ende nuk ka marrë një vendim për të ardhmen.

Kevin Zefi është një prej talenteve më premtues të futbollit shqiptar dhe pritet që të luajë një rol të rëndësishëm në të ardhmen e Kombëtares U-21 dhe më tej, në ekipin A.