Zjarret në vend: Situatë problematike, evakuohen banorët e fshatit Dhivër në Finiq

Vendi ynë prej disa muajsh vijon të përballet me situatën e rënduar të zjarreve.

Gjatë 24 orëve të fundit zonat më problematike janë në malet mbi fshatin Dhivër, pjesë e bashkisë Finiq dhe Zona e ish-Uzinës Mekanike Poliçan.

Mbrëmjen e së mërkurës, për shkak të përkeqësimit të situatës u bë evakuimi i banorëve të fshatit Dhivër, fatmirësisht nuk raportohet për persona të lënduar.

Policia e Beratit ka proceduar në gjendje të lirë një person i cili ka ndezur zjarrin në Uzinës së Armëve në Poliçan. 63-vjeçari vuan nga probleme të shëndetit mendor.

Zjarri nisi fillimisht në pyllin që ndodhet pranë Uzinës së Armëve në Poliçan, i favorizuar nga era dhe temperaturat e larta ai u përhap me shpejtësi, duke ju afruar zonës C, në të cilën ndodhen magazinat me lëndë plasëse.

Fatmirësisht zjarri devijoi drejt zonës malore,duke u shmangur kështu rreziku i afrimit të tij në depot e armatimit.

Problematike mbetet situata edhe në fshatin Lofkënd, të bashkisë së Mallakastrës, ku zjarri ka përfshirë një sipërfaqe me pisha. Forcat në terren po punojnë për izolimin e tij.

“Në operacionet për shuarjen e zjarreve u angazhuan: 41 automjete zjarrfikëse dhe 314 forca operacionale, të ndihmuar nga Forcat e Armatosura me 30 efektivë, 3 automjet zjarrfikëse me ekuipazh dhe mbështetje nga ajri.”

Agjencia Kombëtare e Mbrojtjes Civile vijon monitorimin e situates dhe ju bën thirrje të gjithë qytetarëve të tregohen të kujdesshëm, të shmangin ndezjen e zjarreve dhe të raportojnë në kohë vatrat.