Kabineti i sigurisë i Izraelit miraton planin e Netanyahut për të pushtuar Gazan

Kabineti i Sigurisë i Izraelit ka miratuar një plan të kryeministrit Benjamin Netanyahu për të pushtuar qytetin e Gazës, bëri të ditur të premten zyra e Kryeministrit, pavarësisht alarmit në rritje ndërkombëtar për krizën humanitare në enklavën e goditur dhe kundërshtimit të konsiderueshëm publik ndaj planit brenda vetë Izraelit.

“Kabineti i Sigurisë ka miratuar propozimin e Kryeministrit për mposhtjen e Hamasit,” thuhet në deklaratë. “IDF (Forcat Mbrojtëse të Izraelit) do të përgatiten për marrjen e kontrollit të Qytetit të Gazës, duke siguruar njëkohësisht ofrimin e ndihmës humanitare për popullsinë civile jashtë zonave të luftimeve.”

Për çfarë votoi kabineti?

Zyra e kryeministrit të Izraelit tha se kabineti i sigurisë kishte miratuar planin për të “mposhtur Hamasin” dhe se ushtria do të përgatitej të merrte kontrollin e Qytetit të Gazës, duke siguruar atë që e përshkroi si “ofrimin e ndihmës humanitare për popullsinë civile jashtë zonave të luftimit”.

Kabineti i sigurisë votoi me shumicë votash për të miratuar atë që e quajti “pesë parimet për përfundimin e luftës”, duke përfshirë kontrollin e sigurisë izraelite të Gazës dhe krijimin e një administrate civile që nuk është as Hamasi dhe as Autoriteti Palestinez.

Nuk është e qartë pse deklarata i referohet vetëm pushtimit të Qytetit të Gazës dhe jo të të gjithë Rripit të Gazës, siç tha Netanyahu të enjten se ishte plani i tij.

Përpara mbledhjes së kabinetit, Netanyahu u pyet nëse Izraeli planifikon të marrë kontrollin ushtarak të të gjithë Gazës. “Ne kemi ndërmend ta bëjmë këtë,” tha Netanyahu për Fox News.

“Ne duam t’ia dorëzojmë atë forcave arabe që do ta qeverisin siç duhet, pa na kërcënuar dhe duke u dhënë banorëve të Gazës një jetë të mirë – kjo nuk është e mundur me Hamasin,” u shpreh ai.

Përpara votimit, një zyrtar izraelit i tha CNN-së se plani me faza që po shqyrtohet do të kërkonte deri në pesë muaj, gjatë të cilëve rreth një milion palestinezë në Qytetin e Gazës dhe zona të tjera do të detyroheshin përsëri të evakuoheshin në zonat jugore të Gazës.

Ushtria do të krijojë komplekse për të strehuar fluksin masiv të palestinezëve të zhvendosur, tha zyrtari.

Qyteti i Gazës është pjesë e 25 përqind të Rripit të Gazës që Forcat Mbrojtëse të Izraelit nuk e kanë pushtuar ende, së bashku me disa kampe refugjatësh në Gazën qendrore.

Këto janë zona ku Izraeli beson se mbahen pengjet e mbetura, dhe Shefi i Shtabit të IDF-së, Eyal Zamir, ka shprehur kundërshtim ndaj operacionit të propozuar të Netanyahut, nga frika se kjo do të rrezikonte robërit.

Plani mbështetet në pesë parime kryesore:

Çarmatimi i Hamasit

Kthimi i të gjithë pengjeve – të gjallë dhe të vdekur

Demilitarizimi i Gazës

Kontrolli i sigurisë izraelite në Gaza

Krijimi i një administrate civile që nuk është as Hamasi dhe as Autoriteti Palestinez

“Një shumicë vendimtare e ministrave të Kabinetit të Sigurisë besonin se plani alternativ që i ishte paraqitur Kabinetit nuk do të arrinte as humbjen e Hamasit dhe as kthimin e pengjeve,” vijon deklarata nga zyra e Kryeministrit.

Nuk është sqaruar menjëherë se cili ishte plani alternativ në fjalë, apo kush e kishte paraqitur atë.

Jashtë ndërtesës, dhjetëra protestues që ishin mbledhur për të shprehur kundërshtimin e tyre ndaj zgjerimit të mundshëm të operacionit ushtarak u përleshën me forcat e policisë.

Protestuesit besojnë se një veprim i tillë do të vinte në rrezik të menjëhershëm jetën e pengjeve që mbahen ende brenda Rripit të Gazës dhe i kanë bërë thirrje qeverisë të zgjedhë rrugën e negociatave me qëllim arritjen e një marrëveshjeje për t’i dhënë fund luftës dhe për lirimin e të gjithë pengjeve.

LEXONI GJITHASHTU:

• Lideri i opozitës izraelite e quan planin e pushtimit të Gazas një “katastrofë”
• Britania zyrtarizon evakuimin e disa fëmijëve nga Gaza për trajtim mjekësor