FOTO/ Zjarri në Finiq përfshin disa banesa, evakuohen banorët

Zjarri që nisi një javë më parë në Dhivër të Delvinës, mbrëmjen e djeshme arriti edhe në Leshnicën e Poshtme në Bashkinë e Finiqit.

Mbrëmja e së dielës ishte e vështirë, pasi situata me zjarret në këtë bashki u bë kritike.

Sipas raportimeve, flakët kanë dëmtuar disa banesa në Leshnicën e Poshtme. Fatmirësisht, banorët janë evakuuar dhe nuk raportohet për persona të lënduar.

Aktualisht, zjarri, i favorizuar edhe nga era e fortë, po përhapet me shpejtësi drejt Leshnicës së Sipërme.

Autoritetet dhe forcat zjarrfikëse po punojnë intensivisht për izolimin e flakëve, por terreni i thyer po e vështirëson ndërhyrjen.

Si pasojë e zjarrit janë dëmtuar disa banesa, ndërsa situata në bashkinë Finiq u përkeqësua edhe më shumë dy ditë më parë për shkak të erërave të forta.

“Në bashkinë Finiq, zjarri ka kaluar në fshatin Krane, njësia administrative Mesopotam.

Në terren kanë operuar: 37 efektivë me 6 automjete zjarrfikëse të bashkive Finiq, Sarandë, Konispol dhe Delvinë, 20 forca policore, 30 forca bashkiake dhe vullnetare, të ndihmuar nga Forcat e Armatosura me 28 efektivë, 4 automjete zjarrfikëse, 1 autoambulancë, 1 autobot, 60 forca ushtarake dhe mbështetje nga ajri.

Gjithashtu ka operuar edhe avioni Kroat Canadair. Gjatë ditës është riaktivizuar vatra e zjarrit brenda fshatit Krongj.

Është bërë evakuimi i banorëve. Në vendngjarje ndodhen 2 automjete zjarrfikëse të MZSH, 1 autoambulancë dhe mjete transporti.

Në ndihmë kanë shkuar dhe 2 automjete zjarrfikëse të FA. Gjatë gjithë natës vatra aktive më problematike ishte ajo në fshatin Leshnicë e Poshtme.

Në terren kanë operuar 3 mjete zjarrfikëse me 8 efektivë të MZSH Finiq dhe Konispol të ndihmuar nga FA me 2 mjete zjarrfikëse dhe 15 forca të FA si dhe 1 grup FNSH”.