Meta nga Sllovenia: Mbështesim dialogun me Serbinë, BE të liberalizojë vizat me Kosovën

Presidenti Ilir Meta bëri thirrje të martën që Bashkimi Evropian të liberalizojë “pa vonesa të mëtejshme” vizat me Kosovën.

Përmes një postimi në Facebook, të cilin e shoqëroi me një video të shkurtër nga vizita në Slloveni për përvjetorin e Procesit të Brdo-Brijonit, Meta tha se liberalizimi i vizave me Kosovën është “një e drejtë ende e mohuar” dhe se sigurimi i kësaj lirie lëvizjeje do të ishte “mbështetje për rrugën e integrimit euro-atlantik të Kosovës”.

Meta vijoi në postimin e tij duke shprehur hapur qëndrimin se shteti Shqiptar do ta mbështesë dialogun Kosovë-Serbi dhe një marrëveshje përfundimtare.

“Shqipëria do ta mbështesë dialogun Kosovë-Serbi dhe një marrëveshje përfundimtare detyruese, gjithëpërfshirëse dhe të zbatueshme, që normalizon plotësisht marrëdhëniet midis dy vendeve, si dhe do të kontribuojë në paqen rajonale, stabilitetin dhe perspektivën e përbashkët evropiane,” – u shpreh Meta.

Presidenti ndodhet në Slloveni prej së hënës. Ai pritet në Tiranë të japë sqarimet e tij përballë Komisionit Parlamentar të ngritur për hetimin e veprimtarisë së tij gjatë fushatës zgjedhore. Megjithatë ditën e djeshme nga kryetari i këtij komisioni, deputeti Alket Hyseni u bë me dije se nga Meta nuk ka pasur një shkresë apo përgjigje zyrtare për konfirmimin e ballafaqimit.

Komisioni u ngrit dy javë më parë dhe pas ngritjes së tij, përmes zëdhënësit Tedi Blushi, Presidenti u shpreh se nuk e njihte vendimin e Kuvendit, të cilin ai e konsideron “kukull” dhe “në shkelje të Kushtetutës“ pasi është “njëpartiak”.

Procesi i Brdo-Brijunit është një takim shumëpalësh i vendeve të Ballkanit Perëndimor, mbajtur fillimisht në vitet 2010-2011 nga kryeministrat e asaj kohe të Sllovenisë dhe Kroacisë – dy vende anëtare të Bashkimit Evropian – Borut Pahor dhe Jadranka Kosor, e vijuar më pas nga pasardhësit e tyre duke përfshirë krerët e shteteve të tjera të rajonit: Bosnje e Hercegovinën, Serbinë, Malin e Zi, Kosovën, Maqedoninë e Veriut dhe Shqipërinë.

Në vitin 2014 Kancelarja Angela Merkel e përfshiu këtë seri takimesh shumëpalëshe në të ashtuquajturin “Proces të Berlinit”, i cili synonte theksimin e bashkëpunimit në rajon dhe lehtësimin e integrimit drejt BE-së.