“Gazetar i rrallë”, Kurti mesazh ngushëllues për ndarjen nga jeta të Artur Zhejit

Kryeministri i Kosovës, Albin Kurti, ka ndarë një mesazh ngushëllimi për ndarjen nga jeta të gazetarit Artur Zhejit një ditë më parë në moshën 64-vjeçare.

Në një postim në faqen e tij në Facebook, Kurti e cilëson Zhejin si një gazetar të rrallë, që “përtej lajmit të ditës angazhohej dhe thellohej me seriozitet intelektual te çështjet dhe subjektet me të cilat ballafaqohej”.

Postimi i plotë i Kurtit

Artur Zheji, personalitet i medias së shkruar e asaj televizive është ndarë dje prej nesh në moshën 64-vjeçare. I kujtoj bashkëbisedimet me të, para apo pas kamerave, sepse të rrallë kanë qenë dhe janë gazetarët që, përtej lajmit të ditës, angazhohen e thellohen me seriozitet intelektual te çështjet e subjektet me të cilat ballafaqohen. I tillë ishte Artur Zheji, fjala e të cilit nuk thuhej për t’u harruar të nesërmen.

I ati i lindur në Gjirokastër, intelektuali erudit dhe përkthyesi eklektik Petro Zheji. E ëma e lindur në Gjakovë, aktorja e shquar e Teatrit Kombëtar në Tiranë dhe e Kinostudios “Shqipëria e Re”, Besa Imami.

Duke ardhur prej një familje të tillë, është e kuptueshme pse Artur Zheji nuk mund t’ishte i përciptë në trajtimin e Kosovës dhe më gjerësisht shqiptarëve në rajon. Ai ishte jo thjesht një reporter i luftës, por një gazetar aktivist, një patriot i emancipuar, një dokumentues i angazhuar, që ndihmoi të ndërkombëtarizohej çështja jonë e të rritej jehona e kërkesës sonë të drejtë për liri.

Familjes, të afërmve, kolegëve, bashkëpunëtorëve dhe publikut të Petro Zhejit, u shpreh ngushëllimet e mia të sinqerta për këtë humbje të madhe!

LEXONI GJITHASHTU:

• Ndarja nga jeta e Artur Zhejit, reagon Rama: Lamtumirë mik kohësh të tjera
• Vdekja e Zhejit, reagon politika! Meta: humbje e madhe, Veliaj: Lajm i hidhur