Zjarri në Pishë Poro vijon të përhapet/ Forcat zjarrfikëse dhe ushtria në terren

Zjarri i nisur një ditë më parë në pyllin me pisha të Pishë Poros, në njësinë administrative Novoselë, vijon të jetë aktiv edhe këtë të martë. Pas një nate me përhapje të shpejtë të flakëve, situata këtë mëngjes është disi më e qetë, për shkak të uljes së intensitetit të erës.

Rreth orës 05:30 të mëngjesit ka rinisur puna intensive e forcave zjarrfikëse për të vënë nën kontroll vatrat aktive. Ndryshe nga dje, në ndihmë janë angazhuar edhe forcat e ushtrisë, të cilat ndodhen aktualisht në terren.

Për momentin nuk ka ndërhyrje nga ajri, por pritet që kjo të ndodhë në orët në vijim, në varësi të zhvillimeve në terren dhe kushteve atmosferike.

Sipas burimeve zyrtare, sipërfaqja e djegur gjatë natës është zgjeruar ndjeshëm dhe flakët vijojnë të përhapen. Megjithatë, autoritetet shprehen se zjarri mund të vihet nën kontroll brenda ditës, në bazë dhe të kushteve të motit.

Aktualisht nuk ka rrezik për banesat, pasi ato ndodhen larg vatrës së zjarrit.

LEXONI GJITHASHTU:

• Lëvizje në Kryeministri në prag të formimit të qeverisë së re: Takimet e Ramës
• U arrestua gjatë pelegrinazhit në malin e Tomorit, GJKKO lë në burg Dorian Beun