Konflikti Izrael-Palestinë, Franca projekt-rezolutë në OKB, pak shanse për paqe

Franca ka bërë një përpjekje të re diplomatike për t’i dhënë fund dhunës mes Izraelit dhe Palestinës, duke depozituar një projekt-rezolutë në Këshillin e Sigurimit të Organizatës së Kombeve të Bashkuara, që bën thirrje për armëpushim.

Megjithatë, bombardimet mes palëve tregojnë se konflikti ka pak shanse që të marrë fund.

“Ne do vazhdojmë për sa kohë të jetë e nevojshme për rivendosjen e paqes për qytetarët izraelitë. Jam i sigurt se armiqtë tanë po e shohin çmimin që po paguajnë për agresionin ndaj nesh,” – u shpreh kryeministri i Izraelit, Benjamin Netanyahu.

Në Izrael ka pasur të paktën 12 viktima, mes të cilëve dy fëmijë. Palestinezët në Gaza thuhet se kanë qëlluar rreth 3.300 raketa ndaj Izraelit deri më sot.

 “Sa herë që dëgjoj një oshëtimë uroj të jetë një derë që mbyllet, ndryshe është një raketë që bie. E gjithë kjo më shkakton panik,” – tha Almog Sahar, një  banore e Gazës.

Sulmet ajrore izraelite dhe të shtënat e tankeve kanë lënë të paktën 215 të vdekur në Gaza, përfshirë gra e fëmijë. Fushata ushtarake ka shkatërruar gjithashtu rreth 7.000 ndërtesa, ndërkohë që konflikti është përhapur edhe në Bregun Perëndimor.

“Kur të shihni tokën tuaj, njerëzit tuaj dhe familjen që sulmohen dhe humbet gjithçka që ke, atëherë do mund ta kuptoni përse njerëzit zemërohen,” – tregoi Hazem Diab, banor i kampit Al Arroub.

Ndërkohë, në kalimin e Rafahut me Egjiptin, e vetmja pikë hyrjeje në Gaza që nuk kontrollohet nga Izraeli, 15 kamionë me karburant dhe 18 me ushqime kanë hyrë në territor.

LEXONI GJITHASHTU:

• Izraeli nuk ndalet, Netanyahu shpërfill ndërkombëtarët: Sulmet do vijojnë
• Hungaria i vetmi komb kundër thirrjes së BE për armëpushim Izrael-Hamas
• 52.000 palestinezë janë zhvendosur, “Amnesty International” kërkon hetime për sulmet e Izraelit