Irena Gjoka gjyqtarja që ka në dorë “fatin” e Metës, reagon avokati i kreut të PL-së

Pas përcaktimit të gjyqtares Irena Gjoka për shqyrtimin e dosjes së ish-presidentit Ilir Meta, mbrojtësi i tii ligjor, Kujtim Cakrani, deklaron jo zyrtarisht, se do të kërkojë dorëheqjen e gjyqtares nga çështja dhe në rast se kjo e fundit nuk do të pranojë, atëherë ai do bëjë kërkesë për përjashtimin e saj.

Sipas Cakranit, nuk mundet të shqyrtojë dosjen një gjyqtare e cila është dënuar në shtetin grek dhe që njëkohësisht është anatemuar edhe nga Ilir Meta dhe nga partia që drejtohet prej tij, Partia e Lirisë.

“Në kushtet kur Gjoka ka probleme me ligjin, nuk mundet të marrë në dorëzim këtë dosje”, deklaroi Cakrani.

Kujtojmë se Prokuroria e Posaçme kundër Korrupsionit dhe Krimit të Organizuar ka dërguar për gjykim dosjen në ngarkim të ish-presidentit Ilir Meta dhe ish-bashkëshortes së tij, Monika Kryemadhi.

SPAK bën me dije se Ilir Meta akuzohet për kryerjen e veprave penale:

“Korrupsioni pasiv i funksionarëve të lartë shtetërorë ose i të zgjedhurve vendorë” në tre raste, dy prej të cilave në bashkëpunim,

“Pastrimi i produkteve të veprës penale ose veprimtarisë kriminale” në bashkëpunim,

“Refuzimi për deklarim, mosdeklarimi, fshehja ose deklarimi i rremë i pasurive dhe interesave private”.

Ndërkohë, Monika Kryemadhi akuzohet për të njëjtat vepra penale, duke përfshirë dy raste korrupsioni pasiv, pastrim të produkteve kriminale në bashkëpunim, si dhe mosdeklarim të pasurive.

LEXONI GJITHASHTU:

• Kryemadhi gjen unazën me diamant dhe rubin përballë SPAK: Do paguaj avokatin
• Kryemadhi akuza ndaj Tedi Blushit: Po e manipulon Metën, e largoi nga shtëpia
• Apeli i GJKKO e la në burg, reagon Ilir Meta: Asnjë zhgënjim nga drejtësia me regji