Të shtëna me armë në Shkodër, vritet një person në qendër të qytetit

Shkodra është tronditur mbrëmjen e kësaj të enjteje nga të shtëna me armë zjarri në qendër të qytetit.

Sipas informacioneve paraprake, dyshohet se një person ka mbetur i vrarë si pasojë e të shtënave. Viktima është identifikuar si shtetasi Kristian Kola, një person me precedent penal.

Burime bëjnë me dije se viktima u qëllua në një atentat të mirëmenduar nga dy persona që lëviznin me motor. Ai u qëllua teksa oshte në një lokal me dy persona të tjerë.

Forcat e policisë kanë rrethuar zonën dhe po punojnë për zbardhjen e rrethanave, si dhe për identifikimin dhe kapjen e autorëve.

“Rreth orës 22:30, në lagjen “Vasil Shanto”, në rrethana ende të paqarta, dy shtetas ende të paidentifikuar dyshohet se kanë vrarë me armë zjarri shtetasin K. K., 34 vjeç, i cili ishte në ambientet e jashtme të një lokali.

Shërbimet e Policisë kanë shkuar menjëherë në vendngjarje, janë ngritur pika kontrolli në dalje të qytetit dhe vijojnë kontrollet në zonë e në ambiente të ndryshme, për kapjen e autorëve.

Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorëve”, thuhet në njoftimin e policisë.