Aktualitet | Lajmi i fundit

Kosova turpërohet nga Zvicra në kualifikueset për botëror, reagon kreu i federatës

6 Shtator 2025 | 12:29

Kosova e ka nisur me humbje të thellë kampanjën e saj kualifikuese për Kampionatin Botëror 2026, duke u mposhtur 4-0 nga Zvicra në ndeshjen e parë të Grupit B. Ekipi i trajnerit Franco Foda nuk arriti të gjejë ritmin dhe u duk i pafuqishëm për të ndalur sulmet e shpejta të zviceranëve.

Golin e parë e shënoi Manuel Akanji në minutën e 22-të, duke treguar vështirësitë e Kosovës në mbrojtje. Vetëm tre minuta më vonë, Breel Embolo dyfishoi epërsinë e Zvicrës, ndërsa në minutën e 39-të Edimilson Vidmer shënoi golin e tretë.

Para mbylljes së pjesës së parë, Embolo realizoi edhe golin e tij të dytë personal në minutën e 45-të, duke lënë Kosovën me një disavantazh të madh në fund të 45 minutave të para.

Pavarësisht përpjekjeve në pjesën e dytë, Kosova nuk arriti të rrezikojë seriozisht portën zvicerane, duke reflektuar një nisje të vështirë të këtij cikli kualifikues.

Pas humbjes 4-0 ndaj Zvicrës në Bazel, presidenti i Federatës së Futbollit të Kosovës (FFK), Agim Ademi, ka reaguar duke theksuar se disfatat janë pjesë e futbollit dhe se ekipi duhet të rikuperojë në sfidat e ardhshme.

“Kjo është vetëm një betejë e humbur dhe jo fundi i rrugës. Kam besim te këta djelmosha, të cilët do të nxjerrin mësime dhe do të rikthehen më të fortë”, tha Ademi.

Ai vlerësoi mbështetjen e tifozëve kosovarë në Bazel, ku stadiumi ishte i mbushur kryesisht nga “Dardanët”. “Për këtë mikpritje dhe dashuri të pakufijshme për Kosovën, jam thellësisht mirënjohës”, shtoi ai.

Presidenti i FFK-së bëri thirrje që tifozët të vazhdojnë ta përkrahin kombëtaren, veçanërisht në ndeshjen e radhës ndaj Suedisë, e cila do të zhvillohet më 8 shtator në Prishtinë. “Forca jonë më e madhe është uniteti. Vetëm kështu mund të rikthehemi pas një mbrëmjeje si kjo dhe të vazhdojmë të kërkojmë suksesin e shumëpritur. Kombëtarja është e të gjithëve dhe duhet ta mbështesim në ditë të mira, por edhe në ditë të vështira,” përfundoi Ademi.

LEXONI GJITHASHTU: