Altin Hazizaj: Do kërkojmë të ndalohet me ligj intervistimi nga media i viktimave të dhunës seksuale kur janë të mitur

Në Tiranë dhe Durrës këtë të diel janë paralajmëruar protesta, si një reagim për përdhunimin e 15-vjeçares në Mirditë nga pesë persona. Sipas një raporti të BARNAHUS të vitit 2019-2020, numri më i madh i krimeve seksuale kundër fëmijëve kryhen nga bashkëmoshatarët e tyre. Sipas raportit, grupmosha 10-14 vjeç është ajo më e prekura.

Altin Hazizaj, përfaqësues i rrjetit për mbrojtjen e fëmijëve CRCA tha për Euronews Albania se ajo që nuk po bëhet siç duhet është ajo që konsiderohet mbrojtja e fëmijëve, që nga çështja e shërbimeve për fëmijët që bëhen viktimë e dhunës seksuale.

Sipas tij, është i nevojshëm jo vetëm edukimi i fëmijëve, por gjithë qenieve njerëzore në Shqipëri që ta kuptojë se s’mund të kryesh marrëdhënie seksuale me një fëmijë se është marrëdhënie kriminale dhe shkatërron jetë njerëzore.

Ai e cilësoi si një precedent të rrezikshëm sjelljen e medias përballë këtyre fenomeneve, teksa theksoi se do kërkojnë që të ndalohet me ligj intervistimi nga media i viktimave të dhunës seksuale kur këta të fundit janë të mitur.

”Jemi shumë prapa me modelet e mbështetjes së viktimës dhe media duhet në çdo rast ta trajtojë fenomenin, por jo duke ekspozuar viktimat dhe familjet e tyre. Viktima në çdo vend të botës është e ndaluar me ligj të intervistohet. Ne do të kërkojmë nga nesër që çdo TV ta ketë të ndaluar me ligj intervistimin e viktimave të krimeve seksuale”, tha z. Hazizaj.