Kreu i inteligjencës së jashtme britanike: Nuk ka prova që Putin dëshiron armëpushim

Ukraina ka pranuar propozimet për armëpushim dhe një samit, por Moska deri tani ka mbetur jo-angazhuese.

Kreu i inteligjencës së jashtme britanike (MI6), Richard Moore, tha të premten se nuk ka “absolutisht asnjë provë” që presidenti rus Vladimir Putin kërkon të negociojë për t’i dhënë fund pushtimit të plotë të Ukrainës.

“Putin po na mban me premtime boshe. Ai kërkon të imponojë vullnetin e tij imperial me çdo mjet. Por nuk mund të ketë sukses,” tha Moore duke shtuar se Putin ka kaluar çdo masë.

Lufta vijon tashmë për më shumë se tre vjet nga nisja e agresionit rus në shkurt 2022, pavarësisht përpjekjeve të reja të SHBA-së dhe aleatëve për ta çuar Moskën dhe Kievin drejt një marrëveshjeje.

Duke folur në Stamboll, Moore tha se pushtimi rus ka forcuar identitetin kombëtar të Ukrainës, ka përshpejtuar afrimin e saj me Perëndimin dhe ka shtyrë Suedinë e Finlandën t’i bashkohen NATO-s.

Ai akuzoi Putinin se po “hipotekon të ardhmen e vendit për një trashëgimi personale,” ndërsa Rusia, sipas tij, është në rënie të përshpejtuar.

Moore, i cili në fund të shtatorit lë postin pas pesë vitesh në krye të MI6, prezantoi gjithashtu një portal të sigurt komunikimi në “dark web”, të quajtur Silent Courier, për të kontaktuar individë të gatshëm të ofrojnë informacion të ndjeshëm mbi terrorizmin apo aktivitetet e inteligjencës armiqësore.

Presidenti amerikan Donald Trump, gjatë një vizite shtetërore në Mbretërinë e Bashkuar një ditë më parë, tha se Putin “më ka zhgënjyer shumë” në përpjekjet për paqe.

LEXONI GJITHASHTU:

• Rusia pushton dy fshatra në Ukrainën lindore, Zelensky kërkon veprime vendimtare
• Kosova vendos sanksione të reja kundër Rusisë për shkak të luftës në Ukrainë