Prefekti dërgon në Këshillin e Ministrave propozimin për shkarkimin e Veliajt

Prefekti i Qarkut Tiranë i ka dërguar zyrtarisht Këshillit të Ministrave propozimin e Këshillit Bashkiak të Tiranës për shkarkimin e kryebashkiakut Erion Veliaj. Nesër pritet të zhvillohet mbledhja e qeverisë, ku parashikohet miratimi i shkarkimit.

Kjo lëvizje vjen pas një dite intensive aktivitetesh politike në kryeqytet. Kryeministri Edi Rama zhvilloi këtë të mërkurë një takim në Kryeministri me katër nënkryetarët e Bashkisë së Tiranës dhe Ogerta Manastirliu, kandidaten e shpallur nga Partia Socialiste për bashkinë e kryeqytetit. Në takim ishte i pranishëm edhe Anulea Ristani, kryetarja e komanduar e Bashkisë Tiranë.

Në orën 18:00, Rama ka thirrur një tjetër mbledhje me deputetët e Tiranës dhe ministrat e kabinetit qeveritar, që do të mbahet në parkun “Eden” në Kryeministri. Burime bëjnë me dije se fokusi kryesor i diskutimeve ishte organizimi i Partisë Socialiste për zgjedhjet e ardhshme në Bashkinë e Tiranës dhe mbështetja për kandidaturën e Manastirliut.

Kujtojmë që ditën e martë Këshilli Bashkiak i Tiranës votoi më 51 vota pro propozimin e Partisë Socialiste për shkarkimin e Veliajt. Me këtë vendim, kryeqyteti pritet të shkojë në zgjedhje të parakohshme, së bashku me 5 bashki të tjera në vend.

• Të enjten mbledhja e qeverisë ku pritet të shkarkohet ligjërisht Erion Veliaj
• Kush janë 4 këshilltarët e PS që nuk morën pjesë në shkarkimin e Veliajt