Seanca në GJKKO, Irena Gjoka vendos sot nëse dosja “Meta” kalon për gjykim

Mbahet këtë të enjte në orën 11:00, në GJKKO, seanca e parë paraprake në ngarkim të ish-presidentit Ilir Meta.

Kërkesa do shqyrtohet nga gjyqtarja Irena Gjoka, e cila do të vendosë nëse dosja do të kalojë për gjykim ose jo.

SPAK ka marrë të pandehur Ilir Metën, Monika Kryemadhin, nënën e saj Fatime Kryemadhi, Pirro Xhixhon dhe Ema Çokun.

Kujtojmë që gjyqtarja Irena Gjoka kërkoi dorëheqjen nga çështja e ish-presidentit, por nuk iu pranua nga kryetari i komanduar i GJKKO, Erion Bani.

SPAK mbylli hetimet në korrik, ndërsa dosjen e kaloi për gjykim në fund të gushtit, e cila përfshiu tre hetime në një: aferën CEZ-DIA, lobimin e LSI në SHBA dhe hetimin pasuror.

Meta dhe Kryemadhi akuzohen për korrupsion pasiv, pastrim parash dhe mosdeklarim pasurie.

Pirro Xhixho akuzohet për korrupsion pasiv të funksionarëve të lartë, të kryer në bashkëpunim ndërsa Fatime Kryemadhi akuzohet për pastrim parash së bashku me Ema Çokun.

Meta ndodhet në burg që prej tetorit të vitit të kaluar, ndërsa Kryemadhi me detyrim paraqitje.

Më 8 shtator, Apeli i GJKKO rrëzoi kërkesën e Metës për lirimin nga burgu, ndërsa u hodh poshtë edhe një tjetër kërkesë e paraqitur, ku GJKKO nuk e ndryshoi masën ndaj tij.

Ish-presidenti ka bërë rekurs edhe në Gjykatën e Lartë, dhe kërkesa do të shqyrtohet më 9 tetor.

LEXONI GJITHASHTU:

• Ilir Meta mbetet në burg, GJKKO rrëzon kërkesën për zbutje të masës së sigurisë
• Çështja Meta, refuzohet dorëheqja e gjyqtares Irena Gjoka