Ilir Meta mbetet në burg, GJKKO rrëzon kërkesën për zbutje të masës së sigurisë

Gjykata e Posaçme kundër Korrupsionit dhe Krimit të Organizuar hedh poshtë kërkesën e avokatëve të ish-presidentit Ilir Meta për një masë më të butë sigurie.

Edhe kësaj here, GJKKO vendos që masa e “arrestit me burg” të mbetet në fuqi.

Kërkesa për revokimin ose zëvendësimin e masës së sigurisë u shqyrtua në seancë paraprake nga gjyqtarja Irena Gjoka.

Avokatët e Metës kërkuan që masa të zëvendësohet me një më të lehtë, si detyrim paraqitjeje apo ndalim i daljes jashtë shtetit, por gjykata e refuzon.

Avokati Kujtim Cakrani mbërriti në ambientet e GJKKO-së rreth orës 14:00 për të ndjekur procesin.

Pavarësisht argumenteve të mbrojtjes, gjykata vendos se nuk janë plotësuar kushtet ligjore për ndryshimin e masës, duke lënë Metën pas hekurave.

Kjo është e disataherë që ish-presidenti kërkon lirimin nga burgu, por drejtësia vijon të qëndrojë në të njëjtin qëndrim.

Pas përfundimit të seancës, avokati Cakrani deklaroi se kreut të Partisë së Lirisë, Ilir Meta, i janë shkelur të gjitha të drejtat politike, përfshirë të drejtën për të bërë fushatë, edhe brenda ambienteve të paraburgimit, për zgjedhjet parlamentare të 11 majit.

Sipas tij, vendimi i dhënë këtë të premte është politik. Ai shtoi se, për çudi, të gjitha dosjet që lidhen me liderët e opozitës përfundojnë për shqyrtim tek e njëjta gjyqtare e GJKKO-së, Irena Gjoka.

“Në kërkesën tonë kemi parashtruar disa vendime të Gjykatës Evropiane të të Drejtave të Njeriut. Të gjithë liderët e opozitës përfundojnë tek gjyqtarja Irena Gjoka. E prisja këtë vendim dhe e dija që do të rrëzohej kërkesa.

I janë shkelur të drejtat politike. Nuk është lejuar të zhvillojë fushatë, as brenda paraburgimit. Gjyqtarja nuk dëgjon. Ne do të vazhdojmë betejën në Apelin e GJKKO-së, dhe shpresojmë që kjo gjykatë të ngrihet në nivelin që i takon.”

Avokati shtoi gjithashtu se do të ndjekin çdo hap ligjor deri në fund:

“Do t’i shterojmë të gjitha shkallët e gjyqësorit. Gjykata e Lartë është inekzistente në Republikën e Shqipërisë. Nuk ka dhënë asnjë vendim, as shqyrtim, vetëm vendime për mospranim të rekursit.”

LEXONI GJITHASHTU:

• Çështja Meta, refuzohet dorëheqja e gjyqtares Irena Gjoka
• Meta kërkon lirimin nga qelia, gjyqtarja Gjoka shqyrton kërkesën në 19 Shtator