Gjykata e Lartë rrëzon rekursin e Safet Gjicit, lihet në fuqi vendimi për Alma Kaçin

Gjykata e Lartë ka rrëzuar rekursin e paraqitur nga ish-kryebashkiaku i Kukësit, Safet Gjici, duke lënë në fuqi vendimin e Apelit të Posaçëm që e dënonte atë me 3 vite burg, pas përfitimit të gjykimit të shkurtuar.

Gjici kërkonte prishjen e vendimit të Apelit të Posaçëm të datës 24 qershor 2024, dhe shpalljen e tij të pafajshëm për veprat penale të “shpërdorimit të detyrës” dhe “korrupsionit pasiv”.

Ai u dënua fillimisht me 4 vite e 6 muaj burg për një aferë seksuale që ndodhi në ambientet e Bashkisë Kukës me Alma Kaçin, por për shkak të gjykimit të shkurtuar, përfitoi ulje të dënimit në 3 vite.

Ndërkohë, edhe Alma Kaçi u dënua me 1 vit e 6 muaj burg për veprën penale të “korrupsionit aktiv”.

Aktualisht, Safet Gjici po vuan dënimin e mbetur prej 8 muajsh në masën “arrest në shtëpi”, pas lirimit nga qelia më 19 maj 2025 për shkak të problemeve shëndetësore.

LEXONI GJITHASHTU:

• Nis hetimi për mjekun në Tiranë, ngacmojë pacienten gjatë operacionit
• Silva Caka braktis Partinë e Lirisë, emërohet zv.ministre e Brendshme