Në kërkim për drogë dhe ndihmë për kalim të paligjshëm të kufijve, kapet 33-vjeçari

Një 33-vjeçar i shpallur në kërkim për veprimtari kriminale të lidhura me narkotikët dhe ndihmë për kalim të paligjshëm të kufijve është vënë në pranga nga Policia e Durrësit, në kuadër të operacionit të koduar “The Fugitive”.

I arrestuari me iniciale M. R., banues në Durrës, u kap në flagrancë me dhjetëra doza kanabisi, një peshore elektronike, një radio policie dhe dy celularë, të cilat u sekuestruan në cilësinë e provës materiale.

Sipas autoriteteve, M. R. ishte i shpallur në kërkim në bazë të dy urdhërave të lëshuara nga prokuroritë e Durrësit dhe Gjirokastrës:

• Për veprën penale “Prodhimi dhe shitja e narkotikëve”, kryer në bashkëpunim, me urdhër ndalimi të lëshuar më 24.01.2024 nga Prokuroria e Durrësit;

• Për veprën penale “Ndihma për kalim të paligjshëm të kufijve”, me masë sigurie “arrest në burg” të caktuar nga Gjykata e Gjirokastrës, më 12.12.2023.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

LEXONI GJITHASHTU:

• Shtyhet seanca paraprake për dosjen në ngarkim të Veliaj, zbardhet shkaku
• Kryeministra njofton KQZ-në për shpalljen e vakancës së Erion Veliajt