Ndërpritet seanca në Kuvend, deputetët e PD përplasen me ministrin e Drejtësisë

Kuvendi është përfshirë nga debate të ashpra gjatë seancës së të enjtes, pas replikave mes deputetëve të opozitës me ministrin e Drejtësisë Besfort Lamallari lidhur me ngjarjen e rëndë të vrasjes së gjyqtarit Astrit Kalaja.

Lamallari akuzoi opozitën për përdorim të gjuhës së urrejtjes ndaj gjyqtarëve dhe prokurorëve. “Ju duhet t’ju vijë turp”, tha ai.

“Këto janë akuzat dhe gjuha e urrejtjes që keni nxitur ndaj gjyqësorit. Keni ndërsyer militantët. Mos bëj zhurmë — unë flas këtu si përfaqësues i institucioneve të drejtësisë. Nuk keni lënë prokuror pa sulmuar, keni anatemuar partnerët strategjikë, ambasadorin e SHBA-së, të BE-së, vetëm sepse mbështesin reformën në drejtësi. Dhe sot keni gojë të flisni? Çfarë është kjo? S’keni turp! Prandaj ju kanë lënë shqiptarët aty ku ju kanë lënë”, tha Lamallari.

Ndërsa kreu i grupit të PD, Gazement Bardhi iu përgjigj ashpër Lamallarit, duke e quajtur atë “i pafytyrë”.

Kryetari i seancës Niko Peleshi vendosi ndërprerjen e seancës për 5 minuta pas kërkesës së Taulant Ballës, pasi Flamur Noka iu drejtua disa herë me fjalë fyese ministrit të Drejtësise, Besfort Lamallari.

LEXONI GJITHASHTU:

• Astrit Kalaja do nderohet me një minutë heshtje në Kuvend, opozita kërkon debat
• Kuvendi mban 1 minutë heshtje për gjyqtarin Astrit Kalaja