Kreditë e këqija u rritën lehtë në gusht, mbeten në nivelin e 4 përqindëshit

Niveli i kredive me probleme është rritur lehtë gjatë muajit gusht, duke arritur në 4.19% nga 4.04% që ishte në korrik. Edhe pse bëhet fjalë për një rritje të vogël, ky zhvillim shënon ndalimin e prirjes rënëse gjatë këtij viti.

Raporti i kredive me probleme u rrit lehtë për muajin gusht dhe arriti nivelin më të lartë të vitit 2025. Sipas statistikave të Bankës së Shqipërisë, ai arriti 4.19%, nga 4.04% që kishte qenë për muajin korrik. Me bazë vjetore, ky raport ngelet ende në rënie, ndërsa një vit më parë, kreditë me probleme përbënin 4.61 të portofolit.

Edhe të dhënat e muajit gusht konfirmojnë qartë se tendenca rënëse e raportit të kredive me probleme është frenuar gjatë vitit 2025, megjithëse për momentin ende nuk mund të flitet për një cikël të mirëfilltë rritës të tyre.

Sidoqoftë, ecuria e treguesit konfirmon shqetësimet e lidhura me rritjen shumë të shpejtë të kredisë në dy vitet e fundit. Në fund të muajit gusht, portofoli i kredisë për ekonominë kaloi kufirin e 900 miliardë lekëve.

Rritja vjetore e portofolit është ngadalësuar lehtë krahasuar me vitin 2024, por sidoqoftë ngelet në ritme dyshifrore dhe pranë niveleve më të larta në 16 vitet e fundit.

Mund të vlerësohet se stoku i kredive me probleme është rreth 37.7 miliardë lekë, nga 34.9 miliardë lekë që kishte qenë në fund të vitit të kaluar dhe 37.5 miliardë lekë që ishte në të njëjtën periudhë të një viti më pare.

LEXONI GJITHASHTU:

• Kredia për shtëpi nuk do merret lehtë, pritet shtrëngimi i kushteve nga bankat
• Shifrat/ Rritet kredia në euro, dominojnë kërkesat nga bizneset