Balla: Nuk mund të mbahet peng procesi! Do t’i japim Shqipërisë Avokatin e Popullit

Kreu i grupit parlamentar të PS, Taulant Balla gjatë fjalës së tij para gazetarëve nga kryesia e Kuvendit është pyetur lidhur me zgjedhjen e Avokatit të Popullit. Balla u shpreh se opozita nuk mund ta mbajë me peng zgjedhjen e Avokatit të Popullit ndërsa shtoi se kjo situatë vonesash prej 3 vitesh ka ardhur nga mungesa e dëshirës së opozitës.

Ai theksoi se nëse opozita nuk do të bëhet pjesë atëherë ata do ti japin Shqipërisë Avokatin e Popullit. Balla gjatë fjalës së tij bëri thirrje që kandidatët që përmbushin kriteret të aplikojnë.

“Përpjekjet e shumicës parlamentare në kufijtë e 3/5 është që ti japim Shqipërisë një avokat populli edhe në vizionin Shqipëria 2030 anëtare e BE. Në kuptimin për ti dhënë avokat populli dikë që përmbush  profesionalisht parashikimet që ka kushtetuta dhe ligji, jo anëtari i një partie politike, por një përfaqësues i nderuar i shoqërisë civile me kontribute në jetën sociale të vendit.

Nuk mund të jap një parashikimi, sepse ky proces niset me vete-ofrim. I bëj thirrje atyre që përmbushin kriteret që të aplikojnë dhe pas këtij procesi thirrja shkon për grupet  parlamentare te opozitës, kësaj radhe nuk e kanë të drejtën ta mbajnë peng 3 vjet zgjedhjet e avokatit të popullit”, u shpreh Balla.