Izraeli sulmon Libanin, një vit pas armëpushimit të ndërmjetësuar nga SHBA-të

Ndërsa një armëpushim hyri në fuqi mes Izraelit dhe Hamasit këtë muaj, Izraeli nisi disa sulme ajrore në Libanin jugor, 11 muaj pas fillimit të një armëpushimi.

Bombardimi i një biznesi me paisje ndërtimit vrau një kalimtar sirian, plagosi shtatë persona, përfshirë dy gra dhe shkatërroi buldozerë dhe ekskavatorë me vlerë miliona dollarë.

Sulmet pothuajse të përditshme izraelite janë bërë normale në Liban, gati një vit pasi një armëpushim i ndërmjetësuar nga SHBA-të ndaloi konfliktin e fundit midis Izraelit dhe Hezbollahut, shkruan NBC News.

Mona Yacoubian, drejtoresha e programit të Lindjes së Mesme në Qendrën për Studime Strategjike dhe Ndërkombëtare, e përshkroi skenarin e Libanit si një “zjarr më të vogël” dhe jo si një armëpushim.

Libani “mund të shërbejë si model për Gazën, duke u dhënë në thelb liri veprimi forcave izraelite për të sulmuar sa herë që e gjykojnë, një kërcënim pa një rifillim të plotë të konfliktit”, tha ajo.

Konflikti i fundit midis Izraelit dhe Hezbollahut filloi një ditë pasi sulmi i udhëhequr nga Hamasi ndaj Izraelit më 7 tetor 2023 shkaktoi luftën në Gaza. Grupi militant Hezbollah, kryesisht me bazë në Libanin jugor, filloi të qëllonte me raketa drejt Izraelit në mbështetje të Hamasit dhe palestinezëve.

Ndërkohë, Izraeli u përgjigj me sulme ajrore dhe granatime. Konflikti i nivelit të ulët u përshkallëzua në një luftë të plotë në shtator 2024.

Armëpushimi i 27 nëntorit 2024 kërkonte që Libani të ndalonte grupet e armatosura nga sulmet ndaj Izraelit dhe Izraelit të ndalonte veprimet ushtarake “ofensive” në Liban.

Ministria e shëndetësisë e Libanit ka raportuar më shumë se 270 persona të vrarë dhe rreth 850 të plagosur nga veprimet ushtarake izraelite që nga armëpushimi.

Ndërkohë, asnjë izraelit nuk është vrarë nga sulmet nga Libani që nga armëpushimi.

LEXONI GJITHASHTU:

• Hapet rruga e re që lidh shtetet baltike me Poloninë në kohë tensionesh me Rusinë