Muzeu kombëtar i artit mesjetar në Korçë, mbi 27 mijë vizitorë këtë vit

27 mijë persona vendas dhe të huaj, vizituan muzeun Kombëtar të Artit Mesjetar në Korçë gjatë këtij viti. Në muze përgjatë vitit janë hapur ekspozita ndërsa janë ekspozuar edhe ikona të reja.

Muzeu Kombëtar i Artit Mesjetar në Korçë edhe këtë vit ka tërhequr një numër të madh vizitorësh vendas dhe të huaj. Sipas drejtoreshës së muzeut, Fjoralba Prifti, që prej muajit janar muzeun e kanë vizituar mbi 27 mijë turistë, ku pjesa më e madhe janë të huaj.

“Nga janari në shtator kanë qene 27 mijë vizitorë, një nga vitet me të mira për sa i përket vizutueshmërisë. Vizitorët kanë qene të huaj, kryesojnë shtetasit francez”, tha ajo.

Gjatë këtij viti për turistët janë çelur disa ekspozita, ku dy prej tyre vijojnë të jenë ende të hapura. Njëra prej tyre është ‘Koleksioni i botimeve religjioze’, ku për herë të parë po ekspozohen botime që dikur kanë qenë pjesë e kishave dhe katedraleve.

Muzeu ka pasuruar fondin e tij me vepra të reja të artit ikonografik, duke e bërë ekspozimin edhe më të pasur për vizitorët.