Manjani: Si duhet lexuar vendimi i Kushtetueses për përplasjen Meta-Rama

Gjykata Kushtetuese u shpreh se kompetenca për emërimin dhe shkarkimin e ministrit ndahet ndërmjet Kryeministrit, Presidentit dhe Kuvendit.

Ky vendim erdhi pas kërkesës së kryeministrit Rama, pas përplasjes që ai pati me presidentin Meta për mos-dekretimin e Gent Cakajt si ministër për Evropën dhe Punët e Jashtme.

Ish-ministri i Drejtësisë, Ylli Manjani tha në Euronews Albania se vendimi i Gjykatës Kushtetuese nuk duhet parë si fitore e Metës apo humbje e Ramës, por si një normë e re juridike, e cila në thelb apelon për thellimin e dialogut ndërmjet institucioneve.

“Gjykata Kushtetuese ka bërë një interpretim mbi interpretimet. E kuptoj se ka shumë simpatizantë në krahët e ndryshëm të politikës, të cilët e shohin si fitore e njërit apo tjetrit, por unë mendoj se kjo çështje nuk duhet të trajtohet si fitore e Metës apo humbje e Ramës, por është një çështje ka tentuar të vendos pikat mbi “i” në interpretimin e Kushtetutës”, tha Manjani.

Ai theksoi se kryeministri mbi bazën e vendimit të Kushtuetueses është i detyruar të ndajë informacione shtesë me kreun e shtetit sa i takon emrave që propozon për t’i pasur në kabinetin qeveritar.

“Vërtet kryeministri është njëri i rëndësishëm në kuptimin politik, i cili i përzgjedh dhe i propozon emrat e ministrave, por nuk mund të lërë pa përfshirë edhe vendimmarrjet e institucioneve të tjera, siç është rasti i presidentit. Tani [kryeministri] do jetë i detyruar të ndajë informacion apo bisedime paraprake për emrin e ministrit të ri që do të caktojë, ky është qëllimi”, tha ai.

Në interpretimin e nenit 98 të Kushtetutës, Gjykata Kushtetuese në vendimin e djeshëm theksoi se Kryeministria-Presidenca dhe Kuvendi në raste të tilla duhet të udhëhiqen nga parimi i luajalitetit kushtetues.

LEXONI GJITHASHTU: 

• Gjykata Kushtetuese shpall vendimin për përplasjen Rama-Meta për dekretimin e ministrave