“Volkswageni” shkrumbohet nga flakët në tunelin e Skërficës, si paraqitet situata

Një automjet ka marrë flakë brenda tunelit të Skërficës në rrugën Kardhiq–Delvinë. Sipas raportimeve, zjarrfikëset e Sarandës, Delvinës dhe Gjirokastrës janë nisur menjëherë në vendngjarje ku po punojnë për shuarjen e flakëve dhe sigurimin e zonës.

Si fillim, Drejtoria e MZSH Gjirokastër u njoftua nga Policia e Shtetit se në tunelin e Skërficës kishte marrë flakë një automjet.

Menjëherë nga shërbimi zjarrfikës u nis drejt vendngjarjes një automjet zjarrfikës me ekipin e ndërhyrjes. Me mbërritjen në vendngjarje u konstatua se automjeti tip “Volkswagen” ishte përfshirë plotësisht nga flakët dhe ndodhej në brendësi të tunelit, në mes të tij.

Ekipi i zjarrfikësve ndërhyri me shpejtësi për shuarjen e flakëve. Pas ndërhyrjes, u bë e mundur shuarja e plotë e zjarrit. Automjeti është djegur plotësisht, po nuk pati dëme të tjera materiale apo në njerëz.