Rinas/ Furnizonte Anglinë me drogë, në pranga 41-vjeçarit, arrestohen dhe 2 të tjerë

Tre persona të shpallur në kërkim për trafik droge dhe kalim të kufirit në mënyrë të paligjshme janë ndaluar dhe kanë rënë në prangat nga Policia Kufitare e Rinasit, këtë të shtunë.

Sipas raportimeve, është arrestuar Denis Xhelili, 41 vjeç, banues në Vlorë, i dënuar nga Gjykata e Vlorës me 13 vjet e 4 muaj burg, për veprat penale “Komplot për furnizim me drogë të klasit A” dhe “Komplot për t’u shmangur nëpërmjet mashtrimit nga ndalimi i importimit të një droge të klasit A”.

Është arrestuar gjithashtu shtetasi V. S., 38 vjeç, i dënuar nga Gjykata e Tiranës me 2 vjet e 4 muaj burgim, për veprën penale “Prodhim dhe shitje të narkotikëve”.

Ndërkohë, është ndaluar shtetasi M. M., pasi Gjykata e Rrethit Gjyqësor ka vendosur konvertimin e dënimit nga gjobë në burgim, për veprën penale “Kalim i paligjshëm i kufirit”.

Në vijim të kësaj, policia ka bërë të ditur se:

“Shërbimet e Policisë Kufitare të Rinasit, si rezultat i analizës së riskut, intervistimit të thelluar, verifikimeve të detajuara të dokumenteve të udhëtimit dhe shkëmbimit të informacionit me partnerët, bënë të mundur ndalimin e 3 shtetasve në kërkim, në hyrje të Republikës së Shqipërisë, konkretisht shtetasit:

Denis Xhelili, 41 vjeç, banues në Vlorë. Ky shtetas është kthyer në kategorinë “Deportiv” nga Mbretëria e Bashkuar dhe, pas intervistimit dhe verifikimeve të detajuara, ka rezultuar se Gjykata e Shkallës së Parë të Juridiksionit të Përgjithshëm Vlorë ka njësuar vendimin e Gjykatës së Kurorës Luton–Chichester, e cila e ka dënuar me 13 vjet e 4 muaj burg, për veprat penale “Komplot për furnizim me drogë të klasit A” dhe “Komplot për t’u shmangur nëpërmjet mashtrimit nga ndalimi i importimit të një droge të klasit A”.

S., 38 vjeç, banues në Tiranë. Ky shtetas udhëtonte nga Belgjika dhe është ndaluar në hyrje të R. Sh., ku pas verifikimeve të kryera ka rezultuar se është dënuar nga Gjykata e Tiranës me 2 vjet e 4 muaj burgim, për veprën penale “Prodhim dhe shitje të narkotikëve”.

M.M, banues në Korçë, pasi Gjykata e Rrethit Gjyqësor ka vendosur konvertimin e dënimit nga gjobë në burgim, për veprën penale “Kalim i paligjshëm i kufirit”.

Ndërkohë, pas intervistimeve të kryera për të tre shtetasit, ata iu dorëzuan për veprime të mëtejshme Drejtorive Vendore Vlorë, Tiranë dhe Korçë.

LEXONI GJTIHASHTU:

• Vodhi para në një subjekt tregtar, arrestohet 33-vjeçari në Lushnje
• I vdes i ati, Lulzim Berisha lë qelinë për të marrë pjesë në ceremoninë mortore