Përkeqësohen kushtete detit, Kapiteneria e Vlorës jep njoftim të rëndësishëm

Kapiteneria e Vlorës ka publikuaar një njoftim të rëndësishëm mbi përkeqësimin e situatës hidrometeorologjike detare brenda dhe jashtë gjirit, gjatë datave 16-17-18-19 nëntor 2025.

Sipas parashikimeve, duke nisur nga ora 23:00 e datës 16 nëntor, era në drejtimin jug–juglindje pritet të arrijë forcën 6-7 ballë, me shpejtësi 15-20 m/s, ndërsa lartësia e dallgëve parashikohet të ngjitet nga 1.5 deri në 2.5 metra.

Për këtë arsye, Kapiteneria ka njoftuar disa masa të detyrueshme:

• Është ndaluar pajisja me leje-nisje për mjetet e vogla lundruese dhe ato të peshkimit që synojnë të operojnë brenda gjirit të Vlorës ose në det të hapur. Ndalimi është në fuqi nga ora 23:00 e 16.11.2025 deri në ora 08:00 të datës 19.11.2025.
• Drejtuesit e mjeteve të vogla dhe anijeve të peshkimit që operojnë brenda dhe jashtë gjirit kërkohen të marrin masa shtesë sigurie për shkak të kushteve të vështira detare.
• Subjektet dhe institucionet që ushtrojnë veprimtari në fushën e detarisë duhet të rrisin gatishmërinë e ekuipazheve dhe të sigurojnë mjetet në port, për të shmangur çdo situatë të papritur.
• Anijet e transportit ndërkombëtar do të vijojnë operimin normalisht sipas destinacioneve përkatëse.
• Përmirësimi i situatës hidrometeorologjike parashikohet të nisë pas orës 08:00 të datës 19.11.2025, kur kufizimet për mjetet e vogla pritet të hiqen.

LEXONI GJITHASHTU:

• Moti i keq, paralajmëron Ministria e Mbrojtjes: Ja qarqet që rrezikohen
• Moti i keq në Elbasan: Probleme në qarkullimin rrugor, ndërprerje të energjisë