Supersfidë në Champions League, Real Madrid kërkon madhështinë ndaj Manchester City

Në mbrëmje, Spanja do të marrë të gjithë vëmendjen e sportdashësve, pasi aty zhvillohet një supersfidë në futbollin evropian, në Ligën e Kampionëve: Real Madrid, vendës, përballet me Manchester Cityn.

Ky është ballafaqimi i 15-të mes tyre, një sfidë që nuk vlen vetëm për 3 pikë, por për historinë, moralin dhe petkun e më të mirit, që do të ndikonte shumë në vazhdimësi.

Madrilenët po kalojnë një formë jo shumë të mirë dhe për Xabi Alonson shkarkimi nuk është larg. Në anën tjetër, Guardiola është i qetë, skuadra po i përgjigjet, por më tepër e ka fituar besimin e drejtuesve.

Në këtë ndeshje anglezët vijnë si favoritë; te Reali mungesat janë të shumta, ndërsa të gjithë shpresojnë se Mbappé do të jetë i gatshëm.

Në 5 ndeshjet e fundit mes tyre, Real Madrid ka fituar 3, një është mbyllur në barazim dhe një fitore u takon anglezëve.

Champions League zhvillon edhe duele të tjera interesante këtë të mërkurë, kur në fushë zbresin edhe kampionët në fuqi, që sfidohen nga Athletic Bilbao në transfertë.

Club Brugge-Arsenal, Juventus-Pafos, Dortmund-Bodø/Glimt dhe Benfica-Napoli, si dhe Leverkusen-Newcastle, priten po ashtu me shumë interes në këtë kompeticion.

Qarabağ-Ajax dhe Villarreal-Copenhagen janë dy sfidat që hapin këtë të mërkurë.