VIDEO/ Inter rikthehet në krye të Serisë A, Milan ndalet nga Sassuolo

Këtë javë ishte radha e Interit për të marrë kreun e Serisë A, aty ku, siç dihet tashmë, gara këtë sezon duket e jashtëzakonshme. Një herë në krye ishte Milan, një herë Napoli apo Roma, dhe tani Inter, me zikaltrit që në fundjavë mposhtën Xhenoan në transfertë.

Një lojë e luajtur më mirë nga të besuarit e Christian Chivu, të cilët gjetën avantazhin që në minutën e 6-të me Bisseck, por dyfishuan brenda fraksionit të parë me Martinez.

Në pjesën e dytë reaguan vendësit dhe gjetën golin me Vitinhan, por që nuk vlejti shumë, pasi në minutat në vijim nuk ndryshoi asgjë, dhe zikaltrit triumfuan 2-1, duke marrë kreun. 33 pikë në 15 javë për ekipin e Chivu, që e sheh veten 1 pikë para Milanit.

Këta të fundit u ndalën nga Sassuolo në shtëpi në duelin e mesditës. Kone kaloi përpara Sassuolon, ndërsa Bartesaghi riktheu ekuilibrat në 45 minutat e para. I njëjti futbollist do t’i jepte avantazhin Milanit, por jo 3 pikët, pasi miqtë barazuan me Lauriente 13 minuta para fundit.

Në sfidat e tjera, Napoli u mposht nga Udinese, ndërsa Juventus u rikthye te fitorja ndaj një kundërshtari si Bologna.

LEXONI GJITHASHTU:

• Real Madrid rikthehet te fitorja, vihet në ndjekje të Barcelonës