Ndotën mjedisin në Tiranë, nën hetim 15 administratorë lavazhesh

Gjatë një operacioni të zhvilluar nga Policia e Tiranës janë vënë nën hetim 15 administratorë lavazhesh për ndotje të mjedisit.

Shërbimet e Komisariatit të Policisë Nr. 2 konstatuan se 15 lavazhe keqmenaxhonin shkarkimin e ujërave të toksikuar nga solucionet e pastrimit, duke i derdhur ato në rrugë dhe në hapësira publike.

Për administratorët e këtyre subjekteve nisi procedimi në gjendje të lire pasi akuzohen për “Ndotja e ajrit, e ujërave dhe e tokës”.

Të gjitha bizneset janë bllokuar deri në marrjen e lejes mjedisore.

Gjithashtu u sekuestruan mjetet që përdoreshin në këto subjekte dhe janë marrë mostra të solucioneve të përdorura për pastrimin e automjeteve me qëllim ekzaminimin kimik.

Shërbimet e Policisë iu kanë dërguar shkresa institucioneve kompetente, për marrjen e masave administrative të nevojshme.

Në kuadër të këtij operacioni është arrestuar një 24-vjeçar pasi vazhdonte punimet pa leje për ndërtimin e një biznesi në zonën e “Don Boskos”, edhe pse ishin ndërprerë më parë.

Teksa vazhdojnë kontrollet për goditjen e krimeve kundër mjedisit, Policia iu bën apel të gjithë subjekteve të pajisen me autorizimet e kërkuara nga ligji.