Rama shkoi t’i takonte të atin në burg, djali i Thaçit e falenderon publikisht

Djali i sh-presidentit Hashim Thaçi ka reaguar pas vizitës që kryeministri Edi Rama i bëri të atit në paraburgimin e Hagës.

Përmes një postimi në rrjetet sociale, Endrit Thaçi, ka shprehur mirënjohjen e tij dhe të nënës ndaj kryeministri Rama, duke vlerësuar jo vetëm fjalët, por edhe veprimet e tij si shembull atdhedashurie dhe përkushtimi.

“Faleminderit shumë Kryeministër Rama nga nana dhe unë. Fjalët por edhe veprat e juaja janë shndërruar në shembull të atdhedashurisë dhe përparimit. Ju na dëshmoni se bashkë jemi më mirë”, shkruan ai.

Reagimi vjen në të njëjtën ditë kur kryeministri Rama njoftoi se kishte dalë nga ambientet e paraburgimit ku prej më shumë se pesë vitesh mbahen ish-krerët e Ushtrisë Çlirimtare të Kosovës. Rama bëri të ditur se gjatë takimit e kishte gjetur Hashim Thaçin në gjendje të mirë, të qetë dhe të buzëqeshur, pavarësisht kufizimeve që, sipas tij  i janë vendosur dhe që i cilësoi të pajustifikuara.

Sipas kryeministrit, biseda me Thaçin u përqendrua te familja, miq të përbashkët, si dhe në çështje që lidhen me Shqipërinë dhe Kosovën.

Po ashtu, pjesë e takimit ishin edhe diskutimet rreth librave dhe leximeve që ish-presidenti po ndjek gjatë qëndrimit në paraburgim, një vend që Thaçi, me humor, e ka quajtur “institut”.

LEXONI GJITHASHTU:

• Rama: Po shkoj në Hagë për të takuar Hashim Thaçin, besoj se e drejta do të fitojë
• Rrëfehet ambasadori Christopher Hill: Pse vendosa të dëshmoj për Thaçin në Hagë