Zhduken shishet e verës “Petrvs Pomedol” 32 mijë $ të Agasit, në hetim Doganat

Prokuroria e Tiranës ka shpallur në kërkim Eno Agasin, i dyshuar për veprime që pengojnë zbardhjen e së vërtetës, kontrabandë të mallrave që paguajnë akcizë dhe magazinim të paligjshëm të tyre. Agasi rezulton të jetë kushëriri i Ergys Agasit, i cili është gjithashtu i shpallur në kërkim në kuadër të hetimeve të SPAK për çështjen “Akshi”.

Sipas hetimeve, gjatë një kontrolli në banesën e Agasit, hetuesit e BKH zbuluan një kantinë vere, ku ndodhej koleksioni shumëvjeçar “Petrvs Pomedol”. Për shkak se vera dyshohej si kontrabandë, sipas procedurës, u njoftua Drejtoria e Doganave.

Strukturat doganore kryen inventarizimin për disa orë dhe përllogaritën një dëm prej rreth 400 milionë lekësh në buxhetin e shtetit, si pasojë e mospagimit të akcizës. Për shkak se kontrolli u zhvillua gjatë natës dhe transporti nuk mund të realizohej, malli u la përkohësisht në ruajtje në ambientet e vilës.

Hetimet tregojnë se gjatë natës, Eno Agasi ka larguar sasinë e verës nga kantina dhe më pas ka hequr edhe serverin e kamerave të sigurisë. Kur furgonët e Doganave janë rikthyer për të marrë mallin dhe për ta dërguar në ruajtje, kanë konstatuar se vera nuk ndodhej më në kantinë.

Për këtë çështje po hetohet jo vetëm zhdukja e koleksionit “Petrvs Pomedol”, por edhe përgjegjësia e mundshme e strukturave doganore që e kishin lënë mallin në ruajtje në objekt, në vend që ta sekuestronin dhe transportonin menjëherë.