Noka reagon pas vendimit të Gjykatës për protestuesit: Qytetarët protestuan kundë “bandës” në pushtet

Katër protestues të arrestuar më 22 Dhjetor u lanë të lirë, ndërsa deputeti i Partisë Demokratike, Flamur Noka, reagoi me kritika ndaj mënyrës se si policia ka trajtuar qytetarët.

Sekretari i Përgjithshëm i PD-së Flamur Noka ka folur këtë të mërkurë pas vendimit të marrë për protestuesit e opozitës nga gjykata lidhur me protestën e 22 dhjetorit.

Në një prononcim për mediat, Noka e cilësoi sjelljen e policisë si të ngjashme me “sjellje bande”, duke e lidhur këtë me tensionin politik aktual në vend.

Ai theksoi se qytetarët protestuan kundër lidhjeve të supozuara të qeverisë me krimin e organizuar dhe se veprimet e policisë po përkeqësojnë perceptimin e stabilitetit në vend.

“Policia e Ilir Prodës sillet si bandë me qytetarët. Këta qytetarë kanë dalë për të protestuar kundër Gys Agasit dhe karteleve, ndërkohë që ata në qelitë e komisariatit akuzohen si destabilizues. Realiteti është që Rama dhe bandat e tij po bëjnë gjithçka për të destabilizuar vendin. Ndërkohë që qytetarët protestonin, Gysi ishte me makinë në eskortën e kryeministrit.”-tha Noka.