Krishtlindje në Berat, besimtarët e krishterë kremtojnë meshën në Katedralen e “Shën Dhimitrit”

Ashtu si në të gjithë Shqipërinë, edhe në qytetin e Beratit, besimtarët ortodoks e katolikë, festojnë sot Krishtlindjet.

Qindra besimtarë ortodoks i janë drejtuar mëngjesin e sotëm Katedrales “Shën Dhimitri” në qendër të qytetit, për të marrë pjesë në meshën e shenjtë. Liturgjia hyjnore me rastin e Krishtlindjeve u mbajt nga At Johan Qako. Ceremonia e lutjes dhe lajmërimit të lindjes së Jezu Krishtit u ndoq nga qindra besimtarë ortodoks beratas.

At Johan Qako uroi gjatë meshës jo vetëm besimtarët ortodoks por të gjithë shqiptarët, për një vit me më shumë begati, dashuri e harmoni në çdo familje. Besimtarët në Berat kanë uruar “Gëzuar Krishtlindjet” dhe kanë përcjellë për të gjitha familjet beratase mesazhin “për një vit sa më të begatë dhe me më shumë dashuri e respekt për njëri-tjetrin”.

Në përfundimit të meshës së shenjtë të Krishtlindjeve, besimtarët ndezën qirinj në flakët e pishtarit që simbolizon “lindjen e Krishtit”. Sipas traditës së festës, besimtarët i marrin qirinjtë e ndezur në shtëpi, si një dritë shprese për një vit më të mbarë.