Çfarë ndodhi me trajnerin fitues? Maresca largohet nga Chelsea

Enzo Maresca ka lënë rolin e tij si trajner i Chelsea-t, me klubin që aktualisht renditet në vendin e pestë në Premier League. Italiani 45-vjeçar largohet më pak se gjashtë muaj pas triumfit në Kupën e Botës për Klube gjatë sezonit të tij të parë në Stamford Bridge.

“Me objektivat kryesore që ende duhen arritur në katër gara, përfshirë kualifikimin për në Ligën e Kampionëve, Enzo dhe klubi besojnë se një ndryshim i jep ekipit shansin më të mirë për ta rikthyer sezonin në rrugën e duhur”, tha Chelsea në një deklaratë zyrtare.

Blutë kanë fituar vetëm një nga shtatë ndeshjet e fundit në ligë dhe kanë marrë vetëm gjashtë pikë nga gjashtë ndeshje në dhjetor, duke mbetur 15 pikë pas liderëve, Arsenalit.

Maresca, i cili kishte kontratë deri në vitin 2029, e kishte nisur me sukses aventurën e tij në Chelsea, duke fituar Ligën e Konferencës UEFA dhe Kupën e Botës për Klube dhe duke siguruar një vend në Ligën e Kampionëve. Megjithatë, marrëdhënia me drejtuesit e klubit u përkeqësua pas disa mosmarrëveshjeve mbi përzgjedhjen e ekipit dhe nënshkrimin e lojtarëve, si dhe pas komenteve publike që habitsën stafin.

Pas ndeshjes së tij të fundit, një barazim 2-2 me Bournemouth më 30 dhjetor, ndihmëstrajneri Willy Caballero tha se Maresca ndihej keq për mungesën e tij gjatë deklaratave mediatike, pasi po mendonte për të ardhmen e tij.

Mbrojtësi spanjoll Marc Cucurella reagoi ndaj largimit të tij me një mesazh në Instagram: “Faleminderit për gjithçka, zotëri, dhe stafit tuaj. Për punën dhe besimin që nga dita e parë, dhe për kujtimet! Të urojmë gjithë të mirat në të ardhmen.”

Kronologjia e periudhës së Marescas te Chelsea:

3 qershor 2024: Emërohet trajner me një kontratë pesëvjeçare.

28 maj 2025: Fiton Ligën e Konferencës së Evropës.

13 korrik 2025: Fiton Kupën e Botës për Klube FIFA.

30 dhjetor 2025: Ndeshja e fundit si trajner, barazim 2-2 me Bournemouth.

1 janar 2026: Chelsea dhe Maresca ndajnë rrugët.