Përmbytjet në Novoselë, grupet e emergjencave nisin verifikimin e dëmeve

Grupet e Emergjencave Civile kanë filluar prej orëve të para të ditës së sotme punën në terren në Njësinë Administrative Novoselë, për të evidentuar dëmet e shkaktuara nga reshjet e shiut gjatë ditëve të fundit.

Ekipet po kryejnë vlerësimin e situatës dhe janë të angazhuara për të nisur procedurat e kompensimeve për familjet dhe banorët e prekur.

Autoritetet lokale bëjnë thirrje për bashkëpunim nga banorët, në mënyrë që procesi të realizohet sa më shpejt dhe efikas.

Novosela ishte një ndër zonat më të prekura në qarkun e Vlorës nga përmbytjet e ditëve të fundit.