Bayern Munich shkatërron 8-1 Wolfsburgun, kryeson bindshëm Bundesligën

Bayern Munich ka regjistruar fitoren më të thellë sezonale në kampionatin gjerman, duke mposhtur Wolfsburgun me rezultatin 8-1. Skuadra e drejtuar nga Vincent Kompany kryeson Bundesligën me 44 pikë, 11 më shumë se ndjekësi më i afërt.

Bavarezët po ecin me hapa të sigurt drejt titullit kampion, duke thelluar nga java në javë diferencën me rivalët. Pas 16 javësh kampionat, Bayern nuk ka pësuar asnjë humbje, me një bilanc prej 14 fitoresh dhe 2 barazimesh.

Ndeshja ndaj Wolfsburgut u dominua plotësisht nga kampionët në fuqi, të cilët kaluan në avantazh që në minutën e 5-të pas autogolit të Fischer. Pejcinovic barazoi përkohësisht për miqtë, por Luis Diaz riktheu epërsinë për Bayernin duke mbyllur pjesën e parë në shifrat 2-1.

Në fraksionin e dytë, vendasit rritën ndjeshëm ritmin, duke shënuar edhe gjashtë gola të tjerë. Olise realizoi golin e tretë, ndërsa një tjetër autogol nga Wolfsburgu e thelloi rezultatin. Më pas, Guerreiro, Kane, Olise dhe Goretzka kompletuan fitoren e thellë 8-1.

Me 63 gola të shënuar dhe vetëm 12 të pësuar, Bayern Munich ka aktualisht sulmin dhe mbrojtjen më të mirë të Bundesligës. Bavarezët kryesojnë gjithashtu edhe renditjen e golashënuesve, ku tre vendet e para mbahen nga Harry Kane, Michael Olise dhe Luis Diaz.