VIDEO/ Momenti kur i paraburgosuri Altin Ndoci mbërrin në spitalin e Durrësit

Këto janë momentet kur i paraburgosuri Altin Ndoci sillet me ambulancë nga burgu i Durrësit në spitalin e këtij qyteti. Nga pamjet shihet se ambulanca ndalon para spitalit, ku fillimisht zbret një efektiv i policisë, më pas kolegu i tij, pas tyre Altin Ndoci dhe më mbrapa tre policë të tjerë.

Nga pamjet, policët nuk e shoqërojnë për krahu Ndocin, por e lënë në ecje të lirshme.

Kujtojmë se i paraburgosuri Altin Ndoci u arratis të martën nga spitali i Durrësit, pasi në ambientet e brendshme të tij shtyu dhe goditi dy policë që po e ruanin dhe doli jashtë, ku e priste një makinë me dy persona, me të cilën u largua.

Ndoci konsiderohet person me rrezikshmëri të lartë shoqërore. Ai akuzohet nga SPAK për vrasje, grup kriminal, etj. Ndoci është në gjykim si pjesë e dosjes “Plumbi i Artë” për masakrën e Bradasheshit, ku mbeti i vrarë vëllai i Erion Alibejt, Endrit Alibejt, xhaxhai i tij Arben Dylgjeri, si dhe një shtetas turk.

Ai u arrestua në vitin 2020, i akuzuar për përfshirje në vrasjen e vëllezërve Besmir dhe Viktor Haxhia në Durrës, si dhe për pjesëmarrje në vrasjen e Dorjan Shkozës dhe Anxhelo Avdisë, po në Durrës, por më pas u shpall i pafajshëm nga gjykata.