Presidenti i Bullgarisë jep dorëheqjen, synon të bëhet kryeministër

Presidenti bullgar, Rumen Radev, njoftoi se po jep dorëheqjen si kreu i shtetit dhe sinjalizoi nisjen e një projekti të ri politik vetëm dy muaj para zgjedhjeve të parakohshme parlamentare në vend, i cili është përfshirë nga një krizë politike e vazhdueshme.

“Demokracia jonë nuk mund të mbijetojë nëse e lëmë në duart e figurave të korruptuara, negociatorëve dhe ekstremistëve”, tha presidenti, duke shtuar se do të paraqesë zyrtarisht dorëheqjen e tij të martën.

Rumen Radev ka mbajtur presidencën e Bullgarisë për nëntë vjet. Spekulimet se ai do të hyjë në garën parlamentare dhe do të kandidojë për postin e kryeministrit kanë ekzistuar prej kohësh dhe u konfirmuan sot. Bullgaria është një republikë parlamentare dhe qeverisja e saj është në duart e parlamentit, Këshillit të Ministrave dhe kryeministrit.

“Ne jemi tashmë anëtarë të Shengenit dhe të eurozonës. Pyetjet këtu janë: pse arritja e këtyre qëllimeve nuk solli stabilitet dhe kënaqësi; pse bullgarët ndaluan së votuari; pse nuk mbështeten në sistemin e drejtësisë dhe nuk u besojnë mediave; pse qytetarët mbushën sheshet dy herë; pse, në një Bullgari evropiane, një përqindje e madhe njerëzish ndihen të varfër dhe akoma më shumë jetojnë në pasiguri”, tha Radev. Ai fajësoi modelin e qeverisjes së “rripit transportues”, “i cili ka tiparet e jashtme të demokracisë, por funksionon përmes mekanizmave të oligarkisë”.