Prokuroria e Përgjithshme përfundoi hetimet, mbërrin në KLGJ shkresa për gjyqtaren Irena Gjoka

Shkresa e Prokurorisë për gjyqtaren Irena Gjoka ka mbërritur pasditen e së mërkurës në Këshillin e Lartë Gjyqësor. Shkresa do të shqyrtohet nga komisioni i zhvillimit të karrierës pranë KLGJ që më pas t’i përcillet mbledhjes së anëtarëve të KLGJ.

KLGJ sipas ligjit është institucioni që duhet të shprehet nëse nga rezultatet e verifikimit te thelluar, nga sektori i dekriminalizimit në Prokurorinë e Përgjithshme, Irena Gjoka është apo jo në kushtet e ndalimit për të qenë gjyqtare e posaçme.

Prokuroria e Përgjithshme më herët bëri me dije se “bashkë me vendimin autentik, Prokuroria i ka përcjellë KLGJ-së edhe vendimin autentik të arkivimit të prokurorit grek lidhur me dënimin, për shkak të mos-ekzekutimit”.

Në të njëjtën kohë, SPAK po zhvillon hetime për këtë rast në një procedim penal pa emër. Irena Gjoka ka gjykuar dosje të rëndësishme që përfshijnë politikanë, zyrtarë të lartë dhe personazhe të krimit të organizuar, duke e bërë këtë proces një verifikim me interes të lartë publik.