Këshilli Bashkiak i Vlorës miraton dy zona për tregje të përkohshme për Tregun Industrial

Këshilli Bashkiak i Vlorës, në mbledhjen e zhvilluar këtë të premte miratoi me shumicë votash vendimin për krijimin e tregjeve të përkohshme ambulante dhe autorizimin për lidhjen e kontratave të qirasë, në kuadër të zhvendosjes së përkohshme të Tregut Industrial.

Sipas vendimit, tregtarët e Tregut Industrial do të zhvendosen përkohësisht në dy zona të përcaktuara nga Bashkia, deri në ndërtimin e tregut të ri.

Vendimi parashikon:

Krijimin e një tregu të përkohshëm ambulant me sipërfaqe 520 m², në lagjen “24 Maji”, zona kadastrale nr. 8604.

Krijimin e një tregu të përkohshëm ambulant në zonën industriale të Vlorës, zona kadastrale nr. 8605.

Ky vendim synon të garantojë vazhdimësinë e aktivitetit për tregtarët gjatë periudhës së punimeve për tregun e ri.

Kujtojmë që tregtarët e Tregut Industrial u paraqitën këtë të premte pranë ambienteve të Pallatit të Kulturës, ku po zhvillohej mbledhja e Këshillit Bashkiak, për të kërkuar një zgjidhje përfundimtare lidhur me vendosjen e tyre pas nisjes së punimeve për ndërtimin e tregut të ri.

Ata kërkojnë nga Bashkia që t’u vihet në dispozicion një treg i mirëfilltë dhe i përshtatshëm, ku të mund të vazhdojnë aktivitetin e tyre tregtar pa u penalizuar ekonomikisht. Sipas tregtarëve, mungesa e një alternative konkrete rrezikon t’i lërë ata pa mundësi pune, ndaj apelojnë për një zgjidhje sa më të shpejtë dhe të drejtë.