Uashingtoni dhe Moska pranë rinovimit të marrëveshjes bërthamore

Shtetet e Bashkuara dhe Rusia kanë rënë dakord të rifillojnë dialogun ushtarak në nivele të larta. Lajmin e ka bërë të ditur Pentagoni, në përfundim të afatit të traktatit për çarmatosjen bërthamore “New START”.

“Ruajtja e dialogut mes forcave të armatosura është një faktor i rëndësishëm për stabilitetin dhe paqen globale, si dhe një mjet për të rritur transparencën dhe për të promovuar uljen e tensioneve”, ka deklaruar Komanda Evropiane e Shteteve të Bashkuara.

Ndërkohë, agjencia e lajmeve “Axios” ka raportuar se dy administratat janë pranë një akordi për të zgjatur traktatin për kontrollin e armatimeve strategjike.

Sipas disa burimeve në dijeni të çështjes, të cituara nga agjencia, drafti nevojitet ende të marrë aprovimin e të dy presidentëve.

“Axios” shton se negociatat mes palëve janë zhvilluar të mërkurën në Abu Dhabi, paralelisht me bisedimet për paqen në Ukrainë.

“Bashkë me palën ruse kemi rënë dakord që të veprojmë në mirëbesim dhe të nisim diskutimet se si ta përditësojmë traktatin”, ka deklaruar një funksionar amerikan.

Ai ka shtuar se marrëveshja paraprake parashikon që të dyja vendet të pranojnë respektimin e kushteve të traktatit për 6 muaj të tjera, kohë gjatë të cilës do të zhvillohen negociata të mëtejshme për një akord të ri.

Uashingtoni kërkon që çdo traktat i ardhshëm të përfshijë edhe Kinën, e cila ka ndërtuar tashmë arsenalin e saj bërthamor. Ndërsa Rusia argumenton se çdo nismë duhet të përfshijë edhe Francën me Britaninë, që janë fuqitë bërthamore evropiane.