Tragjedia në Itali, 4 anëtarët e familjes Kola do të përcillen në banesën e fundit në Peqin

Katër anëtarët e familjes Kola, që humbën jetën në mënyrë tragjike në Porcari të Italisë, janë nisur drejt atdheut për t’u përcjellë në banesën e fundit në fshatin Gryksh i Madh, në Peqin.

Arti Kola, bashkëshortja e tij Jonida dhe dy fëmijët e çiftit, Hajdari 22 vjeç dhe Xhesika 15 vjeçe, u gjetën pa shenja jete më 4 shkurt në shtëpinë ku jetonin. Sipas hetimeve paraprake, shkak dyshohet të ketë qenë asfiksia nga monoksidi i karbonit, i çliruar nga një kaldajë gazi e vendosur së fundmi në banesë.

Autoritetet italiane kryen analizat toksikologjike përpara se trupat të lejoheshin të transportoheshin drejt Shqipërisë. Për të përballuar shpenzimet e kthimit, Durim Kola, vëllai i viktimës, organizoi një fushatë në platformën GoFundMe, e cila brenda pak ditësh siguroi mbi 75 mijë euro nga dhurues të shumtë.

Shtëpia ku ndodhi ngjarja ishte në pronësi të Artit, të cilën ai e kishte blerë rreth tre vite më parë dhe e kishte rikonstruktuar pjesërisht vetë. Arti ushtronte profesionin e piktorit, ndërsa djali i tij i madh punonte si elektricist.