Gruaja nga Filipinet humb jetën pasi hëngri gaforren toksike për të postuar videon në rrjetet sociale

Një influencuese ushqimore 51-vjeçare nga Filipinet ka vdekur pasi ka ngrënë një “gaforre djallëzore” toksike që e kishte gatuar për një video që postoi në mediat sociale.

Më 4 shkurt, Emma Amit postoi një video duke gatuar pjata të ndryshme me ushqime deti me miqtë pasi kishte peshkuar pranë shtëpisë së saj në Puerto Princesa, Filipine. Në pamjet filmike, ajo shihet duke provuar një kërmill deti ndërsa butakët që kishin mbledhur zjenin në një tenxhere të madhe me qumësht kokosi.

Të nesërmen, Emma, ​​e cila ishte një peshkatare me përvojë, u ndje keq pasi hëngri një gaforre toksike të shkëmbinjve nënujorë. Sipas raportimeve, toksinat hynë në qarkullimin e gjakut, duke shkaktuar helmim të rëndë. Fqinjët raportuan se e panë duke u dridhur ndërsa u dërgua në një qendër shëndetësore lokale.

Gjendja e saj u përkeqësua, me buzët që iu kthyen në blu përpara se të humbiste ndjenjat. Ajo u dërgua me urgjencë në spital nga të afërmit, por pavarësisht përpjekjeve të mjekëve, ajo vdiq dy ditë më vonë.

Landi Jemang, kryetari i fshatit Luzviminda, konfirmoi se shkaku i vdekjes ishin të ashtuquajturat “gaforre djallëzore”, duke vënë në dukje se në shtëpinë e saj u gjetën guaska me ngjyra të ndezura të specieve detare.

“Pashë guaska, ishin rreth tetë prej tyre. Nuk e di nëse ishin të gjitha gaforre djallëzore, por dukeshin të ngjashme”, tha ai, duke shtuar se, duke pasur parasysh përvojën e saj në peshkim, ajo duhet të kishte qenë në gjendje t’i identifikonte ato.