Plagosja e 18-vjeçares në Sauk, gjykata cakton masat e sigurisë për familjen Gjuta

Gjykata e Shkallës së Parë të Juridiksionit të Përgjithshëm këtë të martë ka caktuar masat e sigurisë për personat e përfshirë në ngjarjen e ndodhur në “Gjuta Hotel” në Sauk, ku një 18-vjeçare u plagos. Sipas gjykatës i dyshuari për plagosjen do të mbetet në masën e sigurisë “Arrest me Burg”.

Erisjaldo Gjuta, i dashuri i viktimës, i dyshuar për plagosjen, do të qëndrojë në arrest në burg, për veprat penale: moskallëzimi i krimit, veprime që pengojnë zbulimin e së vërtetës dhe mbajtja pa leje dhe prodhimi i armëve, armëve shpërthyese dhe municionit.

Vladimir Gjuta i është caktuar masa “detyrim për t’u paraqitur në policinë gjyqësore”, duke u paraqitur çdo të hënë në orën 10:30 pranë shërbimeve të policisë gjyqësore të Prokurorisë pranë Gjykatës së Shkallës së Parë Tiranë. Ai dyshohet për moskallëzim të krimit dhe veprime që pengojnë zbulimin e së vërtetës.

Mirvete Gjuta, gjithashtu nën hetim për të njëjtat vepra si Vladimir Gjuta, do të paraqitet çdo të hënë të parë të muajit në orën 10:00. Gjykata ka urdhëruar lirimin e saj të menjëhershëm, nëse nuk ekziston ndonjë masë tjetër sigurimi personal ndaj saj.

Vendimi i gjykatës vjen pas vlerësimit të ligjshëm të arrestimeve në flagrancë për tre personat, të cilët dyshohet se kanë penguar zbardhjen e ngjarjes dhe kanë mbajtur pa leje armë dhe municione.