“Unë i përkas Arabisë Saudite”, Ronaldo i përkushtuar tek Al-Nassr

Cristiano Ronaldo thotë se është i lumtur në Al-Nassr pas dyshimeve për të ardhmen e tij në klubin e Arabisë Saudite.

Portugezi 41-vjeçar thuhet se ishte i pakënaqur me mënyrën se si klubi po drejtohej nga Fondi i Investimeve Publike (PIF) i Arabisë Saudite dhe humbi tre ndeshje të fundit.

Ai u rikthye javën e kaluar dhe pasi shënoi dy herë në fitoren 4-0 të së shtunës ndaj Al-Hazem, e cila e dërgoi ekipin e tij një pikë përpara në krye të Ligës Profesionale Saudite, këmbënguli se donte të qëndronte.

“Jam shumë i lumtur”, i tha lojtari ndërkombëtar portugez transmetuesit saudit Thmanyah.

“Siç e kam thënë shumë herë, unë i përkas Arabisë Saudite. Është një vend që më ka pritur shumë mirë mua, familjen time dhe miqtë e mi. Jam i lumtur këtu, dua të vazhdoj këtu. Gjëja më e rëndësishme është që të vazhdojmë të shtyjmë për titullin e ligës, ne jemi atje në krye. Ne bëjmë punën tonë, fitojmë, bëjmë presion, le të shohim në fund të sezonit”, është shprehur Ronaldo.

Ronaldo u transferua në Lindjen e Mesme në dhjetor 2022, menjëherë pasi kontrata e tij me Manchester United u ndërpre me marrëveshje të ndërsjellë, duke u bërë lojtari më i paguar në historinë e futbollit me një pagë vjetore prej 177 milionë paundësh.

Por që nga ardhja e tij, 10 herë kampionët e ligës kanë fituar vetëm Kupën e Kampionëve të Klubeve Arabe të vitit 2023.

Fitorja e së shtunës i bëri ata të kalojnë një pikë përpara Al-Hilal dhe gjithashtu janë kualifikuar në çerekfinalet e Kupës së Azisë AFC.